طبيبة تحذر!! خدي بالك .. علامات تخليكي تشكي إن طفلك بيتعرض للتحرش

قدمت الدكتورة رانيا لطيف أستاذ طب الأطفال عددا من النصائح للأمهات تجعلها تشك حال تعرض طفلها للتحرش.

وقالت عبر صفحتها على الفيس بوك خدي بالك.. علامات تخليكي تشكي ان طفلك بيتعرض للتحرش..

١- تغيير مفاجئ في السلوك:
الطفل فجأة يبقى متضايق على طول، عصبي زيادة عن اللزوم، أو بقى بيخاف من حاجات ما كانش بيخاف منها قبل كده.. ممكن كمان تلاقيه بقى انطوائي ومش عايز يلعب مع حد.

٢- مشاكل في النوم والأكل:
تلاقيه مبقاش عارف ينام كويس، بيجي له كوابيس كتير، أو شهيته للأكل اتغيرت خالص، يا إما مبياكلش خالص يا إما بياكل كتير قوي.

٣- شكاوى جسمانية مش مفهومة:
يبدأ يقولك بطني بتوجعني، أو عندي وجع حولين الشرج أو في منطقة حساسة من غير سبب واضح، أو تلاقي خدوش أو كدمات حوالين الشرج أو المناطق الحساسة.

٤- تصرفات جنسية غير مناسبة لسنه:
ممكن تلاقيه بيعمل حاجات جنسية مع نفسه أو مع أطفال تانيين بطريقة غريبة أو مبكرة قوي على سنه.

٥- خوف من شخص معين أو مكان معين:
تلاقيه بيرفض يروح عند حد معين من قرايبه أو معارفكم، أو مبيرضاش يروح مكان كان بيروحه عادي، وبيبقى خايف ومتوتر لو حد جاب سيرة الحد ده أو المكان ده.

دي كلها حاجات تخليك تاخد بالك وتراقب طفلك كويس وتحاول تفهم منه بالراحة إيه اللي مضايقه..
الأهم إنك تسمعه وتصدقه وتحسسه بالأمان عشان لو فيه حاجة حصلت يقدر يتكلم معاك.
بعد ما يرجع من المَدرسة أو الحضانه ، بعد ما يرجع من تجمع عيلة أو صحاب ، بعد ما يقضوا وقت بره البيت لوحدهم ، بعد خروج أي ضيف من بيتنا ، بعد منسيب الولاد فترة مع حد غيرنا !!!!!!!

بحب أسمعك احكيلي يومك انهارده !
حد ضايقك وانت بره ؟
حد خد منك حاجتك ؟
حد خدك لوحدك بعيد عن أصحابك؟
حد خوفك بحاجة ؟
حد قالك متقولش لماما أو بابا ؟
هنروح المكان ده تاني ولا هتبقي مضايق ؟
تحب تقابل الشخص ده تاني ولا مش عاوز ؟

دي أسئلة وواجب يومي لازم تعمليه مع ابنك أو بنتك من غير ميوصلهم خوف أو رعب من وراها ! ….لازم …