شن الكاتب الصحفى محمد الباز هجوما عنيفا على الإعلامى خالد ابو بكر بسبب الرسالة التى وجهها إلى وزير الداخلية والتى تتضمن انتقادات شديدة لدراما رمضان.
وقال الباز فى تدوينة له على موقع التواصل الاجتماعى الفيس بوك وجه المحامى والإعلامي خالد أبو بكر رسالة إلى وزير الداخلية، يعرض من خلالها شكواه من الدراما الرمضانية وما تتضمنه من جرائم خطف وسرقة آثار، وما تعكسه من ملامح الشارع المصرى التى تفتقد إلى الانضباط.
والحقيقة أننى أشفقت على خالد الذى يعانى على ما يبدو من حول درامى، وبناء عليه فقد وجه رسالته إلى الجهة الخطأ، ولا أدرى هل هذا استسهال منه، أم جبن فى مواجهة المسئولين عن إنتاج المسلسلات التى يتحدث عنها؟
وأضاف الباز لو كان أبو بكر منصفا لعرف أن المسلسلات التى تهين المجتمع المصرى وتظهر أسوء ما فيه ليست مصرية، حتى لو كان كل من يشارك فيها مصريون، فلماذا لا يفكر أبو بكر فى توجيه الرسالة إليهم؟
ثم أنه يتجاهل تماما المسلسلات المصرية التى تم إنتاجها السنوات الماضية التى تقدم دور الشرطة فى مواجهة الإرهاب والجرائم، ويتعامل معها كأنها لم تكن.
واوضح كان يمكن أن تكون رسالة خالد مهمة وذات جدوى لو كانت موضوعية، لكنه وربما لأسباب خاصة به يهدم ما تقوم به الدراما المصرية ولا يرى فيها شيئا ايجابيا، وعليه فأنا أنصحه أن يعيد النظر فيما كتبه ويتحلى بالشجاعة ويوجه غضبه لمن يستحقه.
أخبار متعلقة
يذكر ان الإعلامى خالد أبو بكر كان قد وجه رسالة إلى وزير الداخلية قال فيها تعلمون ان الدراما سلاح خطير يؤثر في العقول تاثير مباشر واثره اكبر من تأثير الخطط الحكومية للنهوض بالعقول
وكان عندنا السنة دي بعض اعمال درامية ناجحة ومحترمة وتستحق التقدير
لكن احنا اسفين يا سيادة الوزير
صرفنا شوية فلوس علي بعض اعمال درامية فيها بلطجة وسلاح وخطف وخناقات وتجارة اثار
هو كمان معلش كان في بعض الاعمال المنتجة في رمضان السنة دي شوية الفاظ الحقيقة جديدة من نوعها
افتكر كمان كان في شكل للشارع المصري يظهر ان معدل الجريمة مرتفع حبتين
انا طبعا وسيادتك عارفين ان الكلام ده هيبقي له اثره في الشارع وان كتير من الشباب الصغير بيتاثر بمثل هذا النوع من الاعمال
فا مبدأيا احنا اسفين لو ضياط مكافحة المخدرات الشغل تقل عليهم حبتين
ولو ضياط المباحث الجنائية ضاعفوا شغلهم مرة كمان
ولو ضباط مباحث الانترنت الدنيا عندهم بقت صعبة
يمكن ده يفضل لحد رمضان اللي جاي
انا بس عندي سؤال يا فندم :
هو ده الشارع المصري بتاعنا ؟
هي دي الأحياء المصرية بتاعتنا الجميلة اللي بيحكمها الأدب والاصول قبل القانون ؟
مش عارف !!
هو كمان يافندم احنا اسفين بالمره ان التعليم والثقافة في البلد بعافية شويتين
وان مواقع التواصل الاجتماعي بينت حال كتير مننا والوضع اللي وصلناله
الكام موضوع اللي فاتوا دول انا عارف ممكن يكلفوك يا سيادة الوزير ضباط من خيرة شبابنا تروح حياتهم في مقاومة العنف والجرائم المتنوعه
احنا اصلي مع انشغالنا بالحرب علي الإرهاب ماعملناش اعمال درامية كافية تشرح دور الرجالة اللي راحت من ضباط مكافحة المخدرات وضباط الامن العام والمباحث
الشهداء اللي راحوا في مواجهة الجريمة عشان يحموا الشارع المصري ويحافظوا علي البيوت المصرية آمنة
رحمة الله عليهم
طولت عليك يا سيادة الوزير انا اسف
بس انا بقترح علي سيادتك يوم الاربعاء اللي جاي في اجتماع الحكومة برئاسة الدكتور مصطفي مدبولي
( اللي هو بينعقد في العاصمة الادارية الجديدة في الجمهورية الجديدة)
هل ممكن تقول للوزراء مجتمعين ان كده كتير ،،،
هل ممكن تقولهم ان ضباط الداخلية هما اللي في الشارع وان الكلام ده بيشوفوا اثره في صورة جرائم ..
هل ممكن يا فندم تقولهم حقيقة الشوارع المصرية الطيبة خاصة في الاماكن الشعبية اللي بيحكمها الاصول
طيب ممكن في الاخر تسألهم يافندم هو احنا بنعمل في روحنا كده ليه ؟
وطبعا انا عارف انك هاتختم كلامك وتقولهم انك ورجالتك برضه علي العهد هاتفضلوا جاهزين تشيلوا مسؤلية الأمن في الشارع
احنا اسفين يا وزير الداخلية لك ولرجالك
ورمضان كريم
