د. أسماء السيد تكتب: ” اللي مش عاجبه يمشي” 

اللى مش عاجبه يمشي

معظم الشركات بتدير بالطريقة دي

فأنا جايا أصدمك

اللي هيمشي حضرتك هينقطع مش هيستقيل ومش هيسلم شغله واللي هييجي هيبدأ من الاول ، بالإضافة اللي هيمشي ممكن جدا يطلع اسرار شركتك

واللي لسه موجود هيكون شغال معاك بس بيتكلم عن شركتك أسواء ما يكون

مش بس كده

كل الكفاءات هتمشي ومش هيفضل معاك غير اللي مش لاقي شغل برا

وهتضطر تقبل باقل جوده شغل لأن كل اللي معاك مستواهم ضعيف

وخد عندك هتتسرق كتير لان معندكش كفاءات تعملك سيستم يحافظ علي فلوسك واذا حظك كويس واستقطبت حد كفء مش هيستحمل شهرين وهيمشي

والأصعب من كل ده

هتخسر اسمك يوم ورا يوم لان سمعه الشركه هتدمر ومفيش حد شاطر هيرضي يشتغل فيها وهتخسر فرص كتير أن اسم شركتك يكبر

وهتفقد الثقه في الجميع وهتبقي مقتنع أن كلهم فشله وانك بتدفع مرتبات علي الفاضي

وهتدي مكافأت لناس لا تستحق

وفجأة هيظهرلك ناس تطبلك وتقولك انك تمام وإن الناس هي اللي وحشه وهتصدقهم ….دول اخطر عليك من عدوك

وهتخسر فلوس كتير وهتعاني دايما ولما تفهم المشكله وتبدأ تحل هيكون بعد خساير كتيره إذا لحقت

للأسف الشديد لسه لحد الان في شركات شغاله بالطريقه دي وأسماء كبيره